Abro este espaciu como una forma de siguir col problema de qué facer col golor a cucho. Lo que nun ye otro que dicir: ¿cómo dar cabida a eses otres realidaes del patrimoniu inmaterial? ¿Como dar cabida a lo que fue silenciao nel intre de la cosmoloxía moderna? ¿Cómo facer con aquello que vuelve, y que reclama de nós una respuesta?
La idea principal de la que parto ye que'l del golor cucho nun ye ún síntoma, la seña d'algo reprimío, y que reclama de nós redeprender a escuchar d'otra manera.
Parto del cucho porque m'atraviesa, porque me conmueve y me fae pensar. Recibí esti regalu, el de la conciencia del cuchu, de la mano de Xosé «Ambás» , un de los principales interllocutores de la mio tesis, y quien me pasó'l testigu d'esta problemática que güei toi por revitalizar. Tendremos tiempu de falar de too ello, pero nun puedo presentar esti espaciu ensín a lo menos floriar dalgo de la conversacion aquella, una conversacion que me dexó esteláu.
Y pongo floriar, sí: digo bien. Pues nun hai nel cuchiversu tanto espaciu pal testimoniu como pa la lóxica del floriar. A diferencia d'aquel, el floriar rara vez repite lo escuchao lliteralmente. N'alianza col poder metamórficu del oyíu, la voz del floriar, que nel cuchiversu ye estándar, fai pasar un tipu de verdá inaudible si namás pensamos dende'l principiu federativu del códigu, del llinguax normalizáu.
L'asturianismu de cuando Conceyu Bable valió pa muncho, pero nun supo qué facer colxs de la pila cucho. Quixo la so llingua y cultura, pa tener una identidá moderna y urbana, pero nun chixo (o nun supo) cómo facer col cucho en sí. Dio-y ascu; valoró más, esi asturianismu, qu'un astronauta –un home estudiáu– saliere pela televisión a dicir «ye», que sacar a una muyer de pañoleta o a un paisano trabayando la tierra.
¡PERO YE QUE TOLA INNOVACIÓN VIEN D'EHÍ! El díi que mos faiga falta nombrar tal nueva situación, tal conceptu inéditu, tendremos que garrar y volver a onde la pila cucho, por eso importa. Ye importante sacar na televisión a unxs paixsanx trabayando la tierra precisamente por eso, porque ye la llingua la tierra. Nun lo olvides, amigu: ye la llingua de la tierra. La llingua de la tierra.